Kryetari i Partisë Socialiste njëherësh Kryeministri Edi Rama në takimin e sotëm me komunitetin shqiptar në Selanik, deklaroi se, shqiptarët dhe grekët duhet t’i shohin territoret e njëri-tjetrit si hapësira bashkëpunimi, zhvillimi dhe mirëqenie të përbashkët.

“Nga leximi i të ardhmes me sytë e të shkuarës, prej ku mendjet e ngushta dhe gojët e mykura të mexhelisit politik dhe mediatik, jo vetëm këtu në Greqi, por edhe në Shqipëri dhe gjetkë në rajonin tonë ushqehen me frytet e kalbura të nacionalizmave ballkanikë dhe jashtë nxjerrin helmet e historisë së përdorur si lëndë luftarake, fitojnë vetëm politikat e vjetra dhe politikanët që rrijnë me kurriz nga e ardhmja”, u shpreh Rama.

Ndërkohë, shtoi Rama, “që lëndohen interesat e popujve dhe të gjithë fëmijëve të këtij rajoni, i cili fatkeqësisht ka prodhuar gjithnjë më shumë histori sesa ka mundur të tresë”.

Ndërsa, shtoi Rama, “leximi me sytë e së ardhmes e historisë së përbashkët me Greqinë na jep mijëra arsye, po aq sa vitet që shqiptarët dhe grekët kanë bashkëndarë diellin në këtë pjesë të kontinentit tonë për të parë tek njëri-tjetri një vlerë dhe një forcë të shtuar në rrugën e pandashme të së ardhmes dhe për t’i parë territoret e njëri-tjetrit si hapësira bashkëpunimi, zhvillimi dhe mirëqenie të përbashkët, jo si copëra hartash të vjetra ku kultivohen drurët e shtrembër të nacionalizmit folklorik”.

(ATSH)