Jonaid Myzyri, drejtor i Komisionit të Prokurimit Publik, i ftuar në episodin 7 të sezonit 3 të Podkastit FLASIM të kryeministrit Edi Rama, shpjegoi se çfarë ka ndryshuar në aspektin e ankesave ndaj këtij sektori, sidomos pas procesit të digjitalizimit.

Myzyri tha se “në vitin 2020, në mes të pandemisë, ne e kishim të qartë vizionin: Duhej digjitalizim i Komisionit të Prokurimit Publik përmes transparencës dhe rritjes së stafit të KPP-së. Digjitalizimi i procesit të dorëzimit të ankesave bëri që ky proces i ndërlidhur edhe me e-Albania, të përkthehej në detyra digjitale të parashikuara nga ligji, si për operatorët ekonomikë, ashtu edhe për kompanitë nënkontraktore dhe KPP-në. Nuk e besuam “uraganin” që do të ndodhte në drejtim të transparencës dhe rritjes së aksesueshmërisë së operatorëve ekonomikë”, tha Myzyri.

Ai solli në vëmendje shifrat e procesit të ankesave në KPP nga periudha janar-shtator 2024.

“Kanë paraqitur ankesë 276 operatorë ekonomikë unikë dhe 69 prej tyre, megjithëse kanë qenë në marrëdhënie tregtare me shtetin shqiptar, nuk u kanë besuar ankesave, por falë digjitalizmit është rritur aksesueshmëria në sistem, e për pasojë edhe transparenca. 23% e operatorëve të rinj ekonomikë drejtohen nga gra ose që janë aksionere e këtyre sipërmarrjeve. Digjitalizimi ka rritur ndjeshëm aksesueshmërisë”.

Nga viti 2010 deri 2020, zinxhiri i ankesave ndaj prokurimeve publike nga operatorët ekonomikë bëhej jashtë sistemit të digjitalizuar.

Sipas Myzyri, një indikator që SIGMA ka matur për Komisionin e Prokurimit Publik për vitin 2024 Komisioni ka mbledhur 90 nga 100 pikë të mundshme, dhe për mekanizmin për procedurat për të ankimuar një vendim që lidhet me prokurimet PKK ka marrë 18 nga 18 pikët në vlerësim.