Berati është kthyer tashmë në një qytet me turizëm 12-mujor. Ndonëse sezoni veror ka përfunduar, interesi nga turistët vijon që të jetë i lartë.

Sipas kryetarit të bashkisë, Ervin Demo, hotelet e qytetit janë të rezervuara edhe në këtë periudhë.

“Shumica e tyre vazhdon të jetë e gjitha e prenotuar për të gjithë muajin tetor dhe patjetër dhe gjatë muajit nëntor. Në fakt i gjithë ky sezon, që në fakt në Berat nuk përkon më me muaj, sepse praktikisht sezoni tashmë është 12 mujor, ka qenë një vit i jashtëzakonshëm. Ne vazhdojmë me një rritje progresive dy shifrore nga viti në vit”, tha demo.

“Deri më tani ose të paktën me statistikat e muajit shtator ne e kemi kaluar shifrën e 800 mijë turistëve dhe besoj që mbyllja e këtij viti do të jetë një vit surprizë sa i përket numrave”, theksoi Demo.

Turistët janë nga shtete të ndryshme, përfshirë edhe kontinente të largëta si Amerika apo Australia.

“Vazhdojnë vendet tradicionale si Italia, Franca, Gjermani, por në 2 vitet e fundit kemi një bum të jashtëzakonshëm turistësh nga Spanja, Holanda, Britania e madhe dhe patjetër vendet nordike”, u shpreh Demo.

Qyteti i një mbi një dritareve preferohet për natyrën, historinë, trashëgiminë kulturore dhe kulinarinë.

Në vitin 2023 Berati u vizitua nga rreth 800 mijë turistë.