Kryeministri Edi Rama deklaroi sot se Presidenca hungareze ka ndikuar ndjeshëm në vendimin për hapjen e kapitujve themelorë për anëtarësimin e Shqipërisë në Bashkimin Evropian.

Rama ndau disa momente nga takimi që zhvilloi të premten në Hungari me homologun Viktor Orban, teksa e cilësoi si aleatin tradicional të Shqipërisë dhe një mik të vyer.

“Me aleatin tradicional të Shqipërisë dhe mikun e vyer Viktor Orban, në vigjilje të ditës së shënuar të hapjes së kapitujve të “themeloreve”, blloku kryesor i negociatave për anëtarësimin e “Shqipërisë 2030” në Bashkimin Europian. Presidenca Hungareze e BE-së ndikoi fuqishëm në këtë zhvillim pozitiv të merituar për Shqipërinë”, u shpreh Kryeministri.

Kryeministri i Shqipërisë, Edi Rama zhvilloi më 11 tetor një vizitë zyrtare në Hungari, ku u takua me homologun e tij Viktor Orban.

Në deklaratën e përbashkët pas takimit, Rama dhe Orban u fokusuan në bashkëpunimin dypalësh, procesin e integrimit të Shqipërisë në Bashkimin Evropian dhe çështje të tjera.

Në fjalën e tij kryeministri Rama theksoi se me homologun e tij kishin biseduar për mundësitë e zgjerimit të bashkëpunimit dypalësh.

Dje, Komiteti i Përfaqësuesve të Përhershëm (Coreper II) ka miratuar një qëndrim të përbashkët të BE-së duke hapur grupin e parë të negociatave me Shqipërinë, duke lejuar kështu mbajtjen e një konference ndërqeveritare me Shqipërinë më 15 tetor 2024 në Luksemburg.

Shqipëria do të jetë e para ndër vendet kandidate që do të hapë negociatat e anëtarësimit sipas metodologjisë së rishikuar të zgjerimit, e cila do të jetë një moment kyç për vendin e Ballkanit Perëndimor.

Grupi i parë i kapitujve mbulon reformat themelore, duke i hapur rrugën fillimit të negociatave për grupe të tjera. Progresi në këto reforma do të përcaktojë gjithashtu ritmin e përgjithshëm të negociatave.

(ATSH)