Besimtarët e krishterë kremtojnë sot festën e Shën Marisë, apo siç njihet ndryshe “Fjetja e Hyjlindëses”.

Kryeministri Edi Rama uroi sot besimtarët e krishterë për ditën e Shën Marisë, ndërsa ndau në rrjetet sociale disa copëza pamjesh nga Manastiri i Zvërnecit në këtë ditë feste.

15 gushti është kulmi i festimeve të ditës së Shën Marisë, që kremtohet nga besimtarët e krishterë si dita kur Shën Maria iu bashkua birit të saj, Jezu Krishtit.

Vetëm pak kilometra larg qytetit të Vlorës, në Zvërnec ndërthuren historia, kultura dhe peizazhet mbresëlënëse, që e bëjnë një atraksion të rëndësishëm turistik.

Kisha e Shën Marisë Hyjëlindëse në Manastirin e Zvërnecit, monument kulture i kategorisë së parë, mirëpret çdo ditë dhjetëra vizitorë shqiptarë e të huaj.

Në manastir mund të shkohet përmes një ure këmbësorësh prej druri. Manastiri është një ndërtim tipik bizantin i ndërtuar në shek. X pas Krishtit. (ATSH)