Papa Françesku u ka bërë thirrje sot udhëheqësve të Grupit të Shtatë (G7) që të miratojnë një qasje të kujdesshme ndaj inteligjencës artificiale (IA) dhe të ndalojnë përdorimin e armëve autonome vdekjeprurëse – në samitin e G7 në Itali.
Duke folur në samit, papa Françesku theksoi si mundësitë emocionuese ashtu edhe rreziqet e mundshme të IA-së.
“I takon të gjithëve ta përdorin mirë atë. Por përgjegjësia i takon politikës për të krijuar kushtet që një përdorim i tillë i mirë të jetë i mundur dhe i frytshëm”, tha papa.
Papa Françesku e përshkroi IA-në si një “mjet jashtëzakonisht të fuqishëm” avantazhet dhe disavantazhet e të cilës vareshin nga mënyra se si përdorej.
“Megjithatë, përdorimi i mjeteve nuk është gjithmonë i drejtuar vetëm për të mirën tonë”, tha papa.
“Kur paraardhësit tanë mprehnin gurë stralli për të bërë thika, ata i përdornin ato për të prerë lëkurën për veshje dhe për të vrarë njëri-tjetrin”, shtoi ai.
Ai theksoi kompleksitetin e IA-së, duke vënë në dukje se ajo mund t’u mundësojë makinerive të marrin vendime autonome.
Megjithatë, ai theksoi se vendimmarrja përfundimtare duhet të mbetet tek njerëzit.
“Ne do ta dënonim njerëzimin për një të ardhme pa shpresë nëse do t’u hiqnim njerëzve aftësinë për të marrë vendime për veten dhe jetën e tyre”, tha ai.
“Vetë dinjiteti njerëzor varet prej tij”, shtoi papa, duke u kërkuar politikanëve të ndalonin përdorimin e armëve autonome vdekjeprurëse.
Françesku është papa i parë që merr pjesë në një samit të G7 në historinë e tij afër 50-vjeçare. (ATSH)
