Kuvendi nisi sot shqyrtimin e marrëveshjes me Italinë për njohjen e pensioneve.

Ministri i Ekonomisë, Kulturës dhe Inovacionit, Blendi Gonxhja deklaroi sot se kjo marrëveshje ka si qëllim mbrojtjen shoqërore për shtetasit e dy vendeve, bazuar në përvojën ndërkombëtare dhe legjislacionet respektive në fuqi.

Përmes saj, tha Gonxhja, konfirmojmë vullnetin dhe angazhimin e qeverive për thellimin e bashkëpunimit dhe çuarjen para të marrëdhënieve diplomatike.

“Kjo marrëveshje që paraqesim sot shënon një garanci shtesë për qytetarët e dy vendeve tona. Marrëveshja garanton që asnjë qytetar të mos humbasë asnjë ditë kontribute, pavarësisht vendit ku ka punuar, duke mundësuar kushtet ligjore për përfitimin e pensioneve, përfitimin e sigurive shoqërore dhe bazohet në parimin e trajtimit të barabartë në punësim dhe të ardhura”, theksoi ai.

Objekti i kësaj marrëveshje, vuri në dukje ai, janë përfitimet nga skema e detyrueshme e sigurimeve shoqërore që përfshijnë, sigurime për pleqërinë, invaliditetin dhe pensionin familjar, sigurimin për përfitimin për sëmundjet dhe barrëlindjet dhe sigurimin e papunësinë”, tha ai.

“Përfitimet nga skema italiane përfshijnë sigurimin e përgjithshëm të detyrueshëm për pension invaliditeti, pleqërie dhe familjar të punonjësve të punësuar; trajtimin e posaçëm të punonjësve të vetëpunësuar në sektor të ndryshëm dhe trajtimin e ndarë të këtij sigurimi të përgjithshëm të detyruar; sigurimin për sëmundjet ku përfshihen edhe tuberkulozi dhe barrëlindja; sigurimi i papunësisë dhe skemat e posaçme zëvendësuese dhe të veçanta të sigurimit të krijuara nga kategori të caktuara punonjësish”, deklaroi ai.

Ai tha se e drejta e qytetarëve për përfitimin nga skema e sigurimeve shoqërore lind në momentin e daljes në pension dhe shtetasve të kenë të njëjtat të drejta dhe detyrime për mbrojtjen shoqërore, ashtu sikundër dhe vendasit.

“Marrëveshja parashikon që periudha e sigurimit e realizuar në njërin shtet të njihet edhe nga shteti tjetër, me kusht që të mos mbivendosen. Çdo person ka të drejtë të tërheqë përfitimin e siguruar kudo ku ai ndodhet. Bashkimi i periudhave kontributive, për të përmbushur afatin minimal (në rastin e Shqipërisë, prej 15 viteve) që duhet për të përfituar pension”, u shpreh ai.

Sipas tij, janë mbi 500 mijë shtetas shqiptarë në Itali përfitues të drejtpërdrejtë nga kjo marrëveshje dhe rreth 4 mijë shtetas italianë në Shqipëri.

“Marrëveshja tregon angazhimin e qeverisës shqiptare për garantimin e mbrojtjes shoqërore të shtetasve shqiptarë kudo ku ata punojnë dhe jetojnë”, tha ministri.

Që prej vitit 2005 e deri më sot Shqipëria ka nënshkruar një sërë marrëveshjes në fushën e sigurimeve shoqërore, ndër të cilat janë me Turqinë, Belgjikën, Hungarinë, Luksemburgun, Çekinë, Maqedoninë e Veriut, Gjermaninë, Austrinë, Bullgarinë, Kanadanë, Rumaninë, Kosovën, me Konfederatën e Zvicrës dhe me Kroacinë.

Pritet të hyjnë në fuqi dhe marrëveshjet me Malin e Zi, e Bullgarinë. Ndërsa janë në proces marrëveshjet me Poloninë dhe Serbinë dhe kanë shprehur dakordësi për fillimin e negociatave vende si Sllovenia, Spanja, Danimarka, Moldavia dhe Emiratet e Bashkuara Arabe.

Ministri deklaroi se qeveria është në proces të përparuar për marrje dakordësie për fillimin e negociatave me Francën.

(Marrë nga ATSH)