Shqipëria dhe Azerbajxhani synojnë të thellojnë më tej bashkëpunimin ekonomik dhe kulturor mes dy vendeve.

Komisioni për Veprimtaritë Prodhuese, Tregtinë dhe Mjedisin, miratoi sot projektligjin “Për ratifikimin e marrëveshjes për bashkëpunimin ekonomik, ndërmjet Këshillit të Ministrave të Republikës së Shqipërisë dhe qeverisë së Republikës së Azerbajxhanit” .

I pranishëm në mbledhjen e komisionit, zëvendësministri i Ekonomisë, Kulturës dhe Inovacionit, Endrit Yzeiraj, tha se, “marrëveshja vjen si një angazhim i përbashkët mes dy vendeve, për të nxitur më tej nismat e bashkëpunimit në sektorë jetikë, si tregtia dhe investimet, energjia dhe lëndët minerale, turizmi dhe mjedisi, arsimi, shkenca dhe kultura”.

Sipas tij, marrëveshja i hap rrugën krijimit të një komiteti të përbashkët ndërqeveritar që ka për detyrë ndjekjen e marrëveshjes, zbatimin e saj, përcaktimin e fushave të ndërveprimit dhe krijimin e marrëveshjeve të tjera të bashkëpunimit.

Yzeiraj, e cilësoi marrëveshjen një mundësi unike për forcimin e bashkëpunimit mes dy vendeve në fushën e arsimit, kulturës dhe ekonomisë.

Relatorja e çështjes, Mirza Petushi vuri në dukje se marrëdhënie e bashkëpunimit mes dy vendeve tashmë janë të konsoliduara në afatgjatë.

“Gati 31 vite më parë janë vendosur marrëdhëniet diplomatike midis Shqipërisë dhe Azerbajxhanin që ndër vite është rritur më tej ky bashkëpunim. Që prej vitit 2011 qeveria shqiptare ka hequr vizat për popullin azer, një veprim në mbështetje të thellimit të bashkëpunimit dypalësh”, u shpreh Petushi.

Ajo theksoi se, bashkëpunimi në energji konsiderohet si nga fushat më të rëndësishme ku përfundimi i projektit TAP, është i një rëndësie strategjike në këtë fushë dhe Shqipëria është e hapur për zgjerimin e investimeve të Azerbajxhanit në infrastrukturën energjetike dhe gazifikimin e vendit.

Petushi tha se qeveria ka në fokus rritjen e investimeve të huaja.

Në këtë kontekst vijoi ajo,”reformat e orientuara nga tregu dhe një kuadër i fortë investimi me stimuj të përshtatshëm dhe mbrojtje të investitorëve në projekte strategjike, janë të dobishme për thithjen e investimeve të huaja”.