Ministrja e Turizmit dhe Mjedisit, Mirela Kumbaro gjatë pjesëmarrjes në Konferencën ndërkombëtare “Oqeani ynë”, në Athinë zhvilloi takime me disa ministra të Greqisë.

Kumbaro pati takime me ministren e Turizmit, Olga Kefalogianni, ministrin e Mjedisit dhe Energjisë, Theodoros Skylakakis dhe ministrin e Punëve të Jashtme, Giorgos Gerapetritis.

“Konferenca e Athinës ishte një mundësi e mirë për t’u takuar me homologët ministra të Greqisë, siç ishin takimet shumë të ngrohta e të frytshme me ministren e Turizmit, Olga Kefalogianni, ministrin e Mjedisit dhe Energjisë, Theodoros Skylakakis dhe ministrin e Punëve të Jashtme, Giorgos Gerapetritis”, theksoi Kumabro në një postim në rrjetet sociale.

Kumbaro nënvizoi se, me promovimin, rezultatet në turizëm dhe vizionin e zhvillimit të qendrueshëm ku i jepet prioritet ekoturizmit, agroturizmit dhe turizmit të Zonave të Mbrojtura, Shqipëria vlerësohet si një model i mirë duke krijuar ura bashkëpunimi nën frymën e fqinjësisë së mirë.