Qeveria shqiptare do të vijojë edhe gjatë këtij viti politikën e rritjes së pagave, për të arritur nivelin e pagës mesatare prej 900 eurosh, të cilin ministri i Financave, Ervin Mete e konsideroi një stacion dhe jo një destinacion.

Mete shpjegoi gjatë një interviste në media kategoritë që do të përfitojnë rritje page këtë verë. Ministri theksoi se fakti që ne arrijmë të bëjmë këtë rritje domethënëse të pagave tregon momentin e mirë që po kalon ekonomia shqiptare.

“Synojmë që brenda muajit prill të mund të detajojmë rritjen për sektorë të caktuar. Pritshmëria është që do të ketë rritje për sektorin e shëndetësisë, mbrojtjes, rendit. Do të ketë rritje domethënëse për arsimtarët. Do të ketë rritje për funksionet mbështetëse në ministri ashtu edhe atë zbatuese si dhe planifikohet edhe një mbështetje për punonjësit e pushtetit vendor. Rritja kumulative duke filluar nga viti 2025 është afro 400 milionë euro, pra një shifër domethënëse për buxhetin e shtetit në mbështetje të punonjësve në sektorin publik me pritshmërinë që kjo do të reflektohet edhe në pagat e sektorit privat që ka filluar tashmë të reflektohet”, u shpreh ministri.

Mete vuri në dukje se synimi është që Shqipëria të ketë një nga pagat më konkurruese në rajon.

“Kemi synim që paga mesatare prej 900 euro të jetë një stacion dhe jo një destinacion final. Në vazhdimësi mund të ketë një mbështetje të mëtejshme sa i përket pagave në sektorin publik”, deklaroi ministri.

Ministri bëri të ditur se nuk do të ketë rritje page për ministrat, deputetët dhe funksionarët e lartë.

“Për punonjës të nivelit të lartë nuk parashikohet të ketë këtë vit një rritje tjetër. Rritja për ta u realizua një vit më parë”, sqaroi ministri Mete.

“Disa funksione, si specialistët, që një vit më parë nuk kanë përfituar apo kanë përfituar rritje page prej 7%, këtë vit do të vijojnë me rritje page 20-30% në varësi të pozicionit. Përgjithësisht rritja fokusohet te punonjësit e shëndetësisë, rendit mbrojtjes, arsimit mbështetës në ministri dhe funksionet zbatuese”, tha ministri Mete.