Kryetarja e Kuvendit, Lindita Nikolla priti sot në takim Ambasadoren e Zvicrës në Shqipëri, Ruth Huber.

Kryetarja Nikolla dhe Ambasadorja Huber diskutuan mbi bashkëpunimin dypalësh parlamentar, prioritetet e punës së Kuvendit të Shqipërisë, ecurinë e zbatimit të programit të projektit mbi mbështetjen e Kuvendit për edukimin qytetar, PACEP, dhe modernizimin e procesit legjislativ, nëpërmjet projektit e-legislation.

Kryetarja Nikolla e falënderoi Ambasadoren Huber mbi bashkëpunimin e shkëlqyer mes Kuvendit dhe Ambasadës dhe vuri në dukje se ky bashkëpunim ka dhënë rezultate të prekshme në modernizimin e shërbimeve parlamentare.

Bashkëpunimi i shkëlqyer mes Kuvendit dhe Ambasadës së Zvicrës do të vijohet nga një komponent i ri, mbështetja e kontrollit parlamentar, për të cilën Kuvendi do të bashkëpunojë me Global Partners Governance.

Kontrolli parlamentar është një funksion thelbësor i Kuvendit dhe ky bashkëpunim i ri i kontribuon fuqizimit të këtij funksioni. Në fokus do të jetë përmirësimi i monitorimit dhe zbatimit të rekomandimeve të institucioneve të pavarura, shoqërisë civile dhe qytetarëve.