“Ne kemi për ta shtyrë më tutje procesin e lehtësimit të shërbimeve për njerëzit në të gjitha drejtimet. Me platformën e-Albania, është bërë një lehtësim i madh, por nuk mjafton. Ne duam që ta shkëpusim komplet burokracinë dhe t’i shkëpusim komplet zyrat e shtetit nga jeta e njerëzve, të cilët të gjithë shtetin do ta kenë në xhep, tek ajo pasqyra e telefonit dhe do ta kenë aty jo vetëm duke e kërkuar, por edhe shteti duke i kërkuar ato”.

Kështu u shpreh sot, kryeministri Edi Rama në Asamblenë e Zgjeruar të Partisë Socialiste në Peshkopi, teksa nënvizoi se, e-Albania do të marrë një formë të re brenda pak kohe.

“e-Albania do jetë një platformë ku gjatë gjithë kohës do jesh në komunikim, siç komunikojmë ne me njëri-tjetrin kur shkruajmë me mesazhe. Ti hyn dhe thua ‘unë dua të marr një certifikatë për këtë’ dhe e-Albania dhe do të jetë një asistent i çdo personi aktiv. Natyrisht, nuk do jenë një milion veta aty mbrapa, por nëpërmjet inteligjencës artificiale, ne po e bëjmë gati, kemi filluar të bëjmë testime dhe është në prag të finalizimit dhe pastaj vitin e ardhshëm do të jetë edhe më e thjeshtë, se nuk do jetë më me mesazhe, por do të jetë me bisedë, siç flet në videocall me dikë tjetër”, u shpreh Rama.

Përveç e-Albania, vijoi kryeministri, që do të ketë të gjitha shërbimet, po bëjmë një kapërcim shumë të madh me Hipotekën dhe do ta zgjidhim shumë shpejt edhe pjesën e mbetur të problemit ku edhe shërbimin hipotekor do mund ta marrë çdokush, jo vetëm siç merret sot që është direkt online dhe nuk ka nevojë fare të shkosh tek zyra, por do jetë dhe diçka shumë e shpejtë.

Rama vuri në dukje se, plot gjëra janë bërë dhe plot të tjera ka ende për të bërë, por që vit pas viti do të shikojmë me më shumë, e më shumë dhe kjo do të përkthehet në radhë të parë në ekonominë e familjeve të të gjithë shqiptarëve, sepse kjo është pjesa më e rëndësishme.

“Ne do donim të bënim shumë më tepër për pensionistët, megjithatë kemi bërë dhe do vazhdojmë të bëjmë edhe më shumë sesa është bërë ndonjëherë. Janë 250 milionë euro plus atij 400 milionëshit të pagave që janë vendosur në dispozicion të rritjes së pensioneve ku përfshihen indeksimet, riindeksimet dhe bonuset e pensionistëve të fundvitit, siç është dhe bonusi që do marrin tani pensionistët përpara Vitit të Ri. Patjetër janë dhe të gjitha fondet që janë për kujdesin social, për të gjithë ata që janë me ndihmë ekonomike, për të gjithë ata që hyjnë në kategoritë e ish-pronarëve të ish-të përndjekurve dhe për të gjitha bebet që lindin në Shqipëri që do vazhdojnë të mbështeten me çekun e bebes sipas atyre kategorive që kemi thënë”, tha Rama.

Marrë nga ATSH