Ministrja e Shtetit për Rininë dhe Fëmijët, Bora Muzhaqi mori pjesë si përfaqësuese e Shqipërisë në Konferencën e 30-të Ndërkombëtare: “Popullsia dhe Zhvillimi: Sigurimi i të drejtave dhe zgjedhjeve” (ICPD 30), në selinë e OKB-së në Gjenevë, organizuar nga UNFPA dhe UNECE.

Në fjalën e saj përshëndetëse në sesionin plenar me përfaqësues të lartë nga mbi 50 shtete, Muzhaqi shprehu mirënjohjen e saj si një ndër 22 shtetet me të drejtë fjale në konferencë dhe theksoi rëndësinë e konferencës.

“Gjatë tri dekadave të fundit, ICPD ka qenë thelbësore në formësimin e politikave dhe strategjive globale në lidhje me popullsinë dhe zhvillimin dhe mbetet sot po aq e rëndësishme sa ishte në vitin 1994”, tha Muzhaqi, duke evidentuar se Shqipëria ka arritur një pjesë të madhe të angazhimeve të saj ndaj ICPD 25.

“Duke folur për progres konkret, ju informoj se Shqipëria ka plotësuar pjesën më të madhe të angazhimeve të saj ndaj ICPD25, duke filluar nga miratimi dhe zbatimi me sukses i Ligjit për Rininë, i cili ka rritur fuqizimin, aktivizmin rinor dhe mirëqenien e të rinjve. Bazuar në Ligjin për Rininë kemi krijuar një skemë të re financimi që aktualisht mbështet projektet e OSHC-ve dhe projektet e bashkive për ndërtimin e infrastrukturës rinore dhe hapësirave miqësore për të rinjtë”, tha Muzhaqi.

Më tej, ministrja prezantoi një pjesë të punës intensive në përmbushjen e angazhimeve të marra në Konferencën Ndërkombëtare të Popullsisë dhe Zhvillimit 25.

“Kemi miratuar dhe zbatuar me sukses ligjin “Për Rininë”, si dhe skemën e re të financimit për OSHC dhe bashkitë në përputhje me kriteret e OKB-së dhe BE-së. Kemi miratuar Strategjinë Kombëtare të Rinisë 2022-2029. Janë ngritur mekanizmat në nivel qendror dhe lokal për të luftuar dhunën me bazë gjinore, si dhe është miratuar Regjistri Kombëtar për të Dënuarit për Krime Seksuale”, u shpreh Muzhaqi.

Marrë nga ATSH