Kryetarja e Kuvendit, Lindita Nikolla, priti sot ambasadorin Luigi Soreca, I Ngarkuar me Punë në Delegacionin e BE-së në Tiranë.

Nikolla shprehu kënaqësinë e rifillimit të bashkëpunimit të Kuvendit me Soreca-n, i cili ka një bazë solide prej misionit të tij si ambasador i BE në Tiranë.

Nikolla dhe Soreca biseduan mbi rritjen e rolit të Kuvendit në integrimin evropian gjatë fazës së zhvillimit të negociatave, për sfidat e lidershipit të Shqipërisë në Procesin e Berlinit si edhe avancimin e reformës në drejtësi dhe reformës elektorale.

Nikolla nënvizoi disa nga masat prioritare që ka marrë Kuvendi, si zbatimi i masave të parashikuara në Planin e Veprimit për zbatimin e rekomandimeve të Raportit të Progresit të Raportit për vitin 2022, fillimi i përgatitjes së dokumenteve mbi procesin e negociatave, si Udhërrëfyesi mbi Funksionimin e Institucioneve Demokratike, përfshirë procesin zgjedhor, rolin e medias në procesin zgjedhor, financimi i partive politike, transparenca dhe integriteti i Kuvendit etj., dhe Udhërrëfyesi mbi Sundimin e Ligjit, përfshirë luftën kundër korrupsionit dhe të drejtat themelore etj. Për t’iu përgjigjur më mirë sfidave të procesit të negociatave, Kuvendi përmirësoi Ligjin mbi rolin e Kuvendit në procesin e intregrimit si edhe krijoi strukturën e re të Shërbimit të Integrimit Evropian. Kuvendi mbështet avancimin e reformës në drejtësi dhe realizimin e reformës zgjedhore. Gjithashtu, Kuvendi po mbështet luftën kundër korrupsionit dhe krimit të organizuar dhe organet e drejtësisë në dhënien fund të kulturës së pandëshkueshmërisë

Kuvendi, nënvizoi Nikolla, do të vijojë të garantojë legjitimitetin demokratik të procesit të integrimit evropian

Ambasadori Soreca shprehu kënaqësinë e bashkëpunimit me Kuvendin dhe institucionet e Shqipërisë, vlerësoi lidershipin e Kuvendit në procesin e integrimit evropian dhe nënvizoi se Shqipëria po hyn në një fazë të re të këtij procesi, vuri në dukje mbështetjen e Delegacionit të BE-së për lidershipin e Shqipërisë në Procesin e Berlinit, vlerësoi rezultatet e dukshme të reformës në drejtësi dhe funksionimin e organeve të drejtësisë, si edhe nënvizoi nevojën për avancimin e reformës elektorale dhe mbështetjen e delegacionit të BE-së për këtë reformë.