Nga Mentor Kikia

Shqipëria, ç’ka qenë, ç’është e ç’do të jetë!

33 vjet pasi jemi shkëputur nga regjimi komunist, ja ku jemi. Nuk po analizoj, thjeshtë po referoj copëza nga raporti i fundit i Freedom House për standardet e demokracisë, drejtësisë dhe lirisë medias…

1 – “Megjithatë, vendi bëri pak përparim të qëndrueshëm drejt shndërrimit në një demokraci liberale të vërtetë dhe ende klasifikohet si një demokraci hibride. Shumica e udhëheqësve politikë shqiptarë mbetën armiqësorë ndaj vlerave liberale demokratike dhe kanë treguar pak vlerësim për faktin se barazia nën ligj dhe respektimi i shtetit të së drejtës, janë vlera të rëndësishme demokratike”.

Komenti im: Pra, jemi ende demokraci hidride, as diktaturë as demokraci, dhe me politikanë harbutë që s’pyesin për vlera, por vetëm për pushtet.

2- “Zgjedhjet lokale që sapo u mbajtën ishin një shembull tjetër që fatkeqësisht, për shkak të rrjeteve të kapjes së shtetit nga parti të caktuara, të bëjnë të mendosh se do të shohim të njëjtën gjë. Mendoj se status quo-ja politike ka të ngjarë të vazhdojë”.

Komenti im: Historia do të vazhdojë. Njëri ka kapur shtetin, tjerit opozitën, dhe nuk lëshojnë pe. Do të vazhdojmë të vuajmë nëse nuk reagojmë masivisht.

3- “Shumica e partive politike mbizotërohen nga udhëheqës me grusht të hekurt dhe kjo mungesë e demokracisë së brendshme partiake u demonstrua në mënyrën se si u përzgjodhën kandidatët për zgjedhjet lokale”

Komenti im: Kryetarët e partive janë edhe pronarët e tyre. Si është demokracia në parti ashtu është edhe demokracia në qeverisje. Kudo “dorë e hekurt”, kudo autoritarizëm.

4- “Drejtësia bazë për shumë qytetarë shqiptarë vërtet mungon. Dhe është gjithashtu një mjedis, ashtu si pjesa më e madhe e rajonit, ku mediat e pavarura po tkurren, aktorët e shoqërisë civile janë në pozitë të vështirë”.

Komenti im: Hapësirat e demokracisë po ngushtohen, dhe të thuash të vërtettën është një lloj heriozimi. Së shpejti mund të jetë edhe vepër penale.

5- “Debati publik dhe media u përqendruan më shumë në dinamikën e brendshme të PD-së sesa në problemet sociale dhe ekonomike me të cilat përballet vendi dhe nevojën për të kërkuar llogari nga qeveria e kryeministrit Rama”.

Komenti im: Media është vënë në shërbim të politikës. Ajo nuk raporton, nuk informon por thjeshtë shpërndan materialet e PR të partive. Në zgjedhjet e majit, e demonstroi këtë në mënyrë të “shkëlqyer”. Media ka qenë kështjella e fundit e demokracisë (hibride) por edhe ajo ka rënë tashmë.