Ministria e Bujqësisë dhe Zhvillimit Rural po zgjeron mbështetjen për rritjen e aksesit të fermerëve të vegjël në tregjet vendase dhe të huaja, duke kontribuar në promovimin dhe shitjen më të shpejtë të produkteve të tyre.

E pranishme në Panairin e Bujqësisë dhe Ushqimit, në Tiranë, ministrja e Bujqësisë dhe Zhvillimit Rural, Frida Krifca informoi se këtë vit do të ndërtohen edhe 5 tregje të tjera, duke i lehtësuar fermerët për shitjen e produkteve, por edhe duke afruar konsumatorin me një gamë më të madhe prodhimesh.

“Krahas investimeve në ngritjen e tregjeve bujqësore sipas modeleve më të mira, së fundmi në Vaun e Dejës, në Farkë etj., po ndihmojmë fermerët të marrin pjesë në panaire lokale dhe ndërkombëtare, me qëllimin kryesor të promovimit të prodhimeve Made in Albania”, u shpreh ajo.

“Bujqësia shqiptare tashmë është gati të hapë dyert e saj për botën, me produkte cilësore dhe sipas standardeve më të mira”, vuri në dukje Krifca.

Ministrja shtoi se qasja e re në agroturizëm ka ngjallur kureshtje të madhe nga vizitorët e huaj, por edhe vendas, dhe kjo është bërë një pikë e rëndësishme për pasaportën e vendit tonë.

“Ushqimi, tradita, klima dhe biodiversiteti janë faktorët kryesorë për bujqësinë. Kemi një trashëgimi të të parëve tanë, dituria e tyre na ka mësuar si ta ruajmë edhe më shumë këtë sektor”, u shpreh Krifca.

“Vitin e fundit e mbyllëm me 500 milionë euro eksporte pasi kemi ndërtuar infrastrukturën, e cila ka ndërthurur përpjekjet individuale dhe të përbashkëta për fermerët”, përfundoi Krifca.