Kryeministri Edi Rama, njëherësh kryetar i PS-së, bëri të ditur sot se në Himarë historia e pronave është zgjidhur dhe se ajo po kthehet te i zoti.

Teksa kërkoi votën për kandidatin e PS-së, Jorgo Goro, Rama tha se garanci për kthimin e pronës te i zoti është vetë ai dhe forca politike që drejton.

“Historia e pronave është zgjidhur, ka ligjin, ka rregullat. Kanë filluar t’i marrin pronat siç iu takon, por e di shumë mirë që ka plot nga ata që si kanë marrë akoma. Po ju them një gjë. Një garanci dhe një mbrojtje keni ju në qoftë se s’doni që t’ju ikin pronat.

Mua! Partinë Socialiste në Tiranë dhe këtë këtu! Nuk keni tjetër! Se nuk ja u solla unë njerëzit nga fundi i botës që të vijnë këtu dhe të bëhen pronarë. Nuk jua kam sjellë unë që dalin me letra dhe që e kanë parë Himarën për herë të parë kur morën pushtetin në Tiranë.

Edhe në det për herë të parë, unë nuk e di a kanë hyrë në det njëherë. Dhe kanë ardhur kanë marrë prona këtu! E dini mirë ju kush janë dhe si janë. S’i solla unë ata! Unë ju kam thënë këtu, ditën e parë që kam ardhur, do t’iu zgjidh çështjen e pronave dhe nuk jeni më njerëz pa njerëz që vijnë jua marrin nga Tirana si të duan dhe e kam mbajtur fjalën”, deklaroi Kryeministri.