Kryeministri Edi Rama ka publikuar në rrjetet sociale pamje nga kantieri i punimeve për ndërtimin e Auto Moto Parkut në Elbasan.

Rama shprehet se Auto Moto Parku bashkë me shëtitoren buzë Shkumbinit do t’i japin një fuqi të re ekonomisë, turizmit, sistemit të sigurisë rrugore, punësimit e sporteve, duke mundësuar gara dhe evente ndërkombëtare të përmasave rajonale e botërore po ashtu.

Cirkuiti i parë shqiptar me pistë 5.3 km dhe një sipërfaqe prej 500,000+ m² në qytetin e Elbasanit do të ndërtohet sipas standardeve të FIA, FIM dhe CIK.

Ky projekt krahas promovimit të kulturës së motorsportit dhe sigurisë rrugore, do të kthehet në një destinacion tërheqës për garuesit e huaj e do të zhvillojë turizmin dhe ekonominë vendase duke e kthyer Shqipërinë në epiqendrën e rajonit për organizimin e eventeve motorsportive.

Kryetari i Bashkisë së Elbasanit, njëherësh kandidat i PS-së në zgjedhjet e 14 majit, Gledian Llatja shprehet se ky është një nga projektet kryesore për zhvillimin e ekonomisë në Elbasan.

“Kemi dëgjuar shumë ta përbaltin. Ata që për hir të politikës ë vjetër janë të gatshëm të pengojnë zhvillimin e qytetit dhe prioriteteve tona kryesore, zhvillimore të ekonomisë në Elbasan. Ata kanë qenë dhe janë gati gati të pengojnë çdo zhvillim të qytetit. Ne do ecim përpara, Elbasani nuk ndalet në punën e tij të zhvillimit”, thekson Llatja në videon e publikuar nga Rama në facebook.

Llatja nënvizon se Auto Moto Parku nuk është thjesht një projekt për automotivin por edhe një pol i qëndrueshëm ekonomik, bashkë me një shëtitoren ku të gjithë qytetarët e Elbasanit mund ta përdorin buzë lumit Shkumbin.

Ai shton se Auto Moto Parku do të sjell zhvillim në ekonomi, punësime dhe biznese të reja të cilat janë mëse të nevojshme dhe të domosdoshme për zhvillimin e qëndrueshëm ekonomik të Elbasanit.

“Ne nuk ndalemi, ne vazhdojmë punën, të tjerët të vazhdojnë llafet. Në 14 maj Elbasani i thotë “PO” Auto Moto Parkut, i thotë “PO” shëtitores buzë lumit Shkumbin, i thotë “PO” zhvillimit të tij dhe të ardhmes së qëndrueshme ekonomike”, shprehet Llatja.

Auto Moto Parku do jetë edhe si qendër eventesh indoor dhe outdoor, muzeun RETRO, Drag Strip me gjatësi 1.2 km në kushte sigurie, Autodromin dhe Kartodromin e parë të homologuar, Akademi Motosporti dhe Akademinë e Edukimit mbi Sigurinë Rrugore, Poligone profesionale testimi, Pistë OFFROAD, Helipad dhe zonë sportive mjetesh ajrore ultra të lehta.

Projekti që financohet nga fondet e DPSHTRR-MIE në bashkëpunim me Bashkinë e Elbasanit dhe me mbështetjen e Qeverisë Shqiptare, përfshin edhe kompleksin e ri të DRSHTRR Elbasan me Qendrën e re të Kontrollit Teknik (Kolaudimi).