Drejtoresha e përgjithshme e Agjencisë Kombëtare të Rinisë, Sara Bodo u shpreh sot se praktikat e punës për studentët ekselentë janë një qasje e nevojshme për administratën publike.

Në aktivitetin e organizuar nga Agjencia Kombëtare e Rinisë, ku të pranishëm ishin edhe Kryeministri Edi Rama, ministri i Turizmit, Kulturës dhe Sportit, Blendi Gonxhja dhe të rinj që kanë përmbyllur thirrjen e 10-të të Programit Kombëtar të Praktikave të Punës, Bodo tha se të rinjtë janë e ardhmja e vendit dhe e administratës publike.

“Kjo praktikë tremujore ka qenë për ju vendosja e themeleve dhe gurëve të parë. Ndërtimi i bazës suaj profesionale dhe njerëzore. Ju nuk keni mësuar vetëm si funksionon administrata publike, por si funksionon përgjegjësia, korrektësia, përkushtimi dhe si ndërtohet besimi”, tha ajo.

Duke iu drejtuar të rinjve, Bozo tha se e ardhmja që ata po ndërtojnë sot nuk do të duket menjëherë, por do të jetë e qëndrueshme.

“Administrata publike është një ndërtesë e madhe që nuk mbahet nga ato mure që duken, por nga themelet e forta që nuk shihen, nga njerëz që punojnë çdo ditë me profesionalizëm dhe integritet”, vijoi Bozo.

Bozo tha se faza e përfunduar e Programit Kombëtar të Praktikave të Punës nuk është fundi i një rrugëtimi, por është fillimi i një përgjegjësie të re dhe një identiteti të ri profesional.

“E ardhmja e vendit dhe administratës publike ndërtohet nga njerëz si ju”, përfundoi Bozo.

Burimi ATSH