OSHEE njofton se deri tani janë nënshkruar 2508 aktmarrëveshje me konsumatorët familjarë për shlyerjen e debive të akumuluara, duke ofruar zgjidhje të thjeshta dhe të përballueshme për qytetarët që kanë detyrime ndaj operatorit.

Sipas të dhënave zyrtare, 131 prej këtyre marrëveshjeve u përkasin kategorive me status të veçantë pensionistë dhe familje me ndihmë ekonomike të cilët përfitojnë një këst të reduktuar prej vetëm 1200 lekësh në muaj.

Gjithashtu, 1848 familje kanë përfituar nga skema që ofron 70% ulje të kamatëvonesave për detyrimet e krijuara deri më 31 dhjetor 2023, duke e bërë procesin e shlyerjes më të përballueshëm.

OSHEE thekson se kjo nismë është pjesë e angazhimit të saj për të standardizuar dhe lehtësuar procesin e shlyerjes së borxheve për konsumatorët në vështirësi financiare.

OSHEE ndau në rrjete sociale videomesazhin e disa qytetarëve që kanë përfituar nga aktmarrëveshjet për shlyerjen e debisë ndaj OSHEE-së me këste mujore.

Ismail Barci, nga Klosi, i cili ka një detyrim prej 400 mijë lekësh, tregon se aktualisht paguan 16 700 lekë në muaj, sipas marrëveshjes së lidhur me OSHEE, krahas faturës mujore.

Ndërsa Athina Paravani, nga Korça, me një debi prej 120 mijë lekësh, shlyen 12 000 lekë në muaj krahas faturës mujore të energjisë.

OSHEE bën të ditur se do të vijojë ofrimin e skemave lehtësuese për qytetarët që kërkojnë të ristrukturojnë detyrimet e tyre dhe të shmangin penalizimet e mëtejshme.

Marrë nga ATSH