Ministri i Mbrojtjes, Pirro Vengu mblodhi sot Komitetin e Emergjencave Civile pas situatës së krijuar nga moti i keq në Shkodër.

Vengu njoftoi në rrjetet sociale se janë ndërmarrë masa duke aktivizuar Regjimentin e Këmbësorisë së Veriut si qendër e ndërhyrjes së shpejtë në ndihmë të çdo bashkie të qarkut.

“Në Shkodër, pas inspektimeve në infrastrukturën parandaluese, mblodhëm Komitetin e Emergjencave Civile. Bashkërendim mes bashkive, Policisë së Shtetit, Drejtorive rajonale të infrastrukturave kritike dhe Forcave të Armatosura, tashmë me një kapacitet të shtuar në Regjimentin e Këmbësorisë së Veriut, i cili shërben si një qendër ndërhyrjeje të shpejtë dhe të vendosur, në ndihmë të çdo bashkie të qarkut”, shkruan Vengu.

Situata të vështirë ka pasur më herët gjatë ditës në aksin rrugor Breg Lumi-Theth, ku si pasojë e motit të keq ka pësuar shembje një masiv inertesh, duke bllokuar pesë mjete dhe nëntë persona.

Ekipet e Agjencisë Kombëtare për Mbrojtjen Civile kanë konfirmuar se të bllokuarit në Ndërlysaj (Theth) janë evakuar dhe nuk ka rrezik për jetën e tyre.

Bashkia e Shkodrës ka njoftuar se po punon për lirimin e rrugëve dhe rikthimin e normalitetit në transport, si dhe për asistencë ndaj qytetarëve të prekur.

Burimi ATSH