Mes 7-9 nëntor 2025 në qytetin e Korçës, fondacioni bullgar “Dua bebe” zhvillon misionin e tij të parë jashtë Bullgarisë, kushtuar mbështetjes së çifteve me vështirësi riprodhuese.

Gjatë tre ditëve specialistët bullgarë do të ekzaminojnë dhe konsultojnë çifte, të cilat përballen me sfida në rrugën drejt prindërimit.

Financimi i iniciativës është siguruar nga fondacioni “Dua bebe” dhe kryetari i fondacionit “Kujtesa bullgare” dr. Milen Vrabevski, me mbështetjen financiare të të cilit deri tani kanë lindur 46 fëmijë. Ekzaminimet do të realizohen në partneritet me Shoqatën për miqësi bullgaro-shqiptare” të Korçës dhe “Balkan Medical Clinic (BMC), Korçë”.

Në hapjen zyrtare të nismës morën pjesë Radina Velçeva – themeluesja e fondacionit “Dua bebe”, Dr. Milen Vrabevski nga “Kujtesa Bullgare”, Dimitër Pandovski – kryetari i Shoqatës për miqësi bullgaro-shqiptare, Z. Sotiraq Filo – kryetari i bashkisë së Korçës, Stefan Gërmeni – drejtori i “Balkan Medical Clinic”, Dr. Georgi Nikolov, drejtori i Qendrës Mjekësore bullgare “Reprobiomed” dhe ambasadori i jashtëzakonshëm dhe fuqiplotë i Bullgarisë në Shqipëri z. Ivaylo Kirov.

Kjo është hera e tretë brenda një muaji e gjysmë dhe gjithsej e pesta për tre vjet, në të cilën fondacioni “Kujtesa bullgare ” organizon vizita të specialistëve bullgarë në rajonin e Korçës, për të siguruar qasje në kujdesin e specializuar mjekësor për popullsinë vendase. Vetëm dy javë më parë specialistët bullgarë në kardiologji, neurologji, urologji, mamologji, dermatologji, ORL, oftalmologji, reumatologji dhe endokrinologji ekzaminuan mbi 350 persona në bashkinë e Pustecit.