Asli Cetinel, E ngarkuara me Punë e Ambasadës së Mbretërisë së Vendeve të Ulëta në Shqipëri u ndal sot te reformat e ndërmarra për konsolidimin e shtetit të së drejtës në Shqipëri, ndërsa nënvizoi rëndësinë e konsolidimit të besimit të publikut tek drejtësia.

Cetinel iu drejtua sot me një fjalë takimit të organizuar nga Inspektori i Lartë i Drejtësisë në bashkëpunim me projektin Matra të qeverisë së Mbretërisë së Holandës, me institucione të drejtësisë për të folur mbi çështje të pavarësisë dhe përgjegjshmërisë së gjyqësorit.

Në fjalën e saj, ajo vlerësoi se integriteti gjyqësor është shtylla kurrizore e shoqërisë. “Është mjaft e rëndësishme të besojmë te drejtësia se përndryshe shteti i së drejtës nuk mund të lulëzojë. Ne e dimë si ka qenë procesi i Vetting-ut në Shqipëri për të forcuar integritetin, profesionalizimin dhe përgjegjshmërinë”, u shpreh ajo.

Sipas Cetinel, “të gjitha reformat në vend kanë shërbyer jo vetëm për të forcuar institucionet e drejtësisë, por për të konsoliduar besimin e publikut tek drejtësia”.

“Gjithashtu kanë shërbyer për të bërë hapa të mëtejshëm për Shqipërinë që të avancojë drejt rrugës për integrimin në BE. Është mjaft e rëndësishme që të realizojmë dhe shtrojmë më tej të gjithë themelet për shtetin e së drejtës”, u shpreh ajo.

Cetinel nënvizoi përkushtimin e Mbretërisë së Holandës në këtë drejtim.

“Qendra për studime dhe trajnime gjyqësore ka shumë vite që ka punuar dhe mbështetur homologët shqiptarë, duke realizuar trajnime dhe marrë pjesë në mjaft projekte binjakëzimi me Shkollën e Magjistraturës. Gjithë ky partneritet afatgjatë arrin një sukses të mëtejshëm me lançimin e projektit ‘Fuqizimi i integritetit gjyqësor’”, u shpreh Cetinel.

Ajo theksoi se deri tani janë ofruar mjaft trajnime për gjyqtarët prokurorët, si dhe për fuqizimin e etikës, integritetin dhe profesionalizmin e tyre.

“Kemi realizuar mjaft seminare dhe kemi sjellë mjaft profesionistë këtu që kanë ndarë përvojën e tyre. Për magjistratët e rinj kemi krijuar një hapësirë të posaçme për të diskutuar për të gjitha dilemat që jo vetëm të fuqizohet ndërgjegjësimi i tyre, por të zgjidhin me integritet situatat komplekse”, tha ajo.

Cetinel theksoi se është mjaft e rëndësishme të fokusohemi te transparenca dhe besimi i publikut, ndërsa vlerësoi kontributin thelbësor të institucioneve të drejtësisë për suksesin e reformave.

/Burimi ATSH