Dita Kombëtare e Arabisë Saudite u festua me një pritje zyrtare mbrëmjen e së enjtes në Tiranë, në një aktivitet të organizuar nga Ambasada e Arabisë Saudite.

Në ceremoni morën pjesë figura të larta të politikës shqiptare, përfaqësues të trupit diplomatik, botës ekonomike dhe medias. I pranishëm në këtë ngjarje ishte edhe Presidenti i Republikës, Bajram Begaj.

Në përshëndetjen e mbajtur me këtë rast ambasadori i Arabisë Saudite në Shqipëri, Faisal Ghazi Hifzi, vlerësoi marrëdhëniet gjithnjë e më të ngushta mes dy vendeve.

Këtë vit, kremtimi i Ditës Kombëtare saudite përkon edhe me Javën Kulturore të Arabisë Saudite, e cila po zhvillohet në Tiranë nga data 16-20 shtator, me një sërë aktivitetesh artistike dhe kulturore. Në kuadër të kësaj jave, në Pallatin e Kongreseve është çelur një panair i artit dhe kulturës arabe, që synon të sjellë më afër qytetarëve shqiptarë trashëgiminë dhe vlerat e pasura të botës saudite.

Aktivitetet e organizuara janë ndërtuar në mënyrë të atillë që të nxjerrin në pah ndërthurjet kulturore midis artit saudit dhe atij shqiptar duke treguar se traditat lidhen dhe pasqyrojnë identitete të përbashkëta.

Vizitorë të shumtë po vijojnë të zbulojnë nga afër historinë, artin dhe vlerat që e kanë bërë Arabinë Saudite një vend me trashëgimi të pasur dhe një vizion modern drejt së ardhmes.

Kremtimet përcjellin mesazhin e thellimit të bashkëpunimit dypalësh në fusha të ndryshme si kultura, ekonomia, arsimi dhe letërsia, si dhe riafirmojnë agjendën e përbashkët për zgjerimin e marrëdhënieve mes Shqipërisë dhe Arabisë Saudite.

Burimi ATSH