Ministri i Mbrojtjes, Pirro Vengu deklaroi sot nga Gramshi se janë evakuuar 200 persona.

“Nxorëm në mënyrë imediate urdhrin evakuimit të Kullollasit dhe më pas të Skëndërbegasit që ishte vatra e dytë dhe ishte mjaft e rrezikshme me një kurorë pishash që u gjend në flakë në mënyrë të menjëhershme”, tha Vengu në një prononcim për mediet.

Vëngu tha se, “kanë operuar 4 mjete helikopterë të forcës ajrore shqiptare dhe të forcave aleate dhe do të vijojnë të operojnë deri në mbrëmje”.

“Po përpiqemi që të sigurojmë një natë sa më të qetë, pavarësisht se do të jetë një vatër, e cila do të vijojë të shkaktojë shqetësime dhe të përhapet. Situata meteorologjike është e tillë, terreni është i tillë”, theksoi Vengu.

“Forcat e Armatosura janë të vendosura në mënyrë masive në mbështetje të të gjithë Gramshit, fshatrave dhe Prefekti është gjithashtu nën udhëzime për të vendosur në dispozicion mjete, jo vetëm të bashkisë, por të gjitha bashkive të qarkut”, theksoi më tej Vengu.

Burimi ATSH