Ekipi i batalionit të Xhenios ka nisur punën për zhbllokimin e kanalit të bypass-it në Vlorë.

Lajmin e dha ministri i Mbrojtjes, Pirro Vengu, i cili ndau pamje nga puna për zhbllokimin e kanalit pas reshjeve të dendura të fundjavës.

Pas një dite të vështirë për shkak të reshjeve të dendura, Vlora iu rikthye mbrëmë normalitetit.

Ministria e Mbrojtjes dhe Bashkia e Vlorës vepruan me shpejtësi për t’i bërë ballë situatës.

Ministri Vengu u shpreh mirënjohës ndaj djemve dhe vajzave të Bazës Mbështetëse të Emergjencave Civile dhe Agjencisë Kombëtare të Mbrojtjes Civile për koordinimin e shpejtë, duke vënë në funksion të plotë sistemin e shkarkimit të hidrovorit të Vlorës.

Në terren ndodhen 11 forca, 2 mjete, 2 motopompa, 3 mjete vetëshkarkuese dhe 1 ekskavator. “Të gjitha strukturat e Mbrojtjes Civile, si në nivel lokal ashtu edhe qendror, janë angazhuar për monitorimin dhe menaxhimin e situatës, duke siguruar funksionimin normal dhe mbrojtjen e qytetarëve, theksoi ai.

Vengu u shpreh se, forcat po monitorojnë me kujdes situatën për të siguruar jetën e qytetarëve dhe për të evituar dëmet materiale në biznese apo banesa.