Zëvendëssekretari i Shtetit për Menaxhimin dhe Burimet, Richard R. Verma, ka zhvilluar një vizitë pune në Tiranë.

Përmes një postimi në rrjetet sociale, Sekretari i Shtetit për Menaxhimin dhe Burimet, Richard R. Verma publikoi disa foto nga takimet e zhvilluara.

Verma në postimin e tij thekson se SHBA synon thellimin e bashkëpunimit për forcimin e demokracisë, sigurisë dhe mbështetjen e atyre në nevojë.

“Vizitova Shqipërinë e bukur! I ngazëllyer për të filluar vizitën time dhe për të punuar me partnerët tanë për forcimin e demokracisë, sigurisë dhe mbështetjen e atyre në nevojë”, thuhet në një postim të publikuar në X.

Zëvendëssekretari i Shtetit për Menaxhimin dhe Burimet Richard R. Verma, po ashtu zhvilloi takime në ambasadën e SHBA në Tiranë.

Ai postoi në Instagram foto nga takimi duke falënderuar Shqipërinë për pritjen e ngrohtë dhe për mbështetjen.

“Ishte kënaqësi teksa mbajta një takim në Ambasadën në Tiranë. Angazhimi me fuqinë tonë punëtore është jetik ndërsa përballemi me sfidat përpara dhe eksplorojmë mundësi të reja së bashku. Faleminderit, Shqipëri, për pritjen tuaj të ngrohtë — jam mirënjohës për mbështetjen tuaj”, u shpreh ai.

Ambasada e Shteteve të Bashkuara të Amerikës në Tiranë njoftoi të martën se zëvendëssekretari i Shtetit për Menaxhimin dhe Burimet, Richard R. Verma do të udhëtojë në Shqipëri, Kosovë dhe Serbi nga 7-11 janar.

Sipas njoftimit, në Tiranë, ai do të diskutojë përparimin demokratik të Shqipërisë, aftësitë mbrojtëse dhe thellimin e lidhjeve ekonomike me Shtetet e Bashkuara dhe do të falënderojë qeverinë e Shqipërisë për mbështetjen e vazhdueshme ndaj aleatëve afganë, njofton Departamenti Amerikan i Shtetit.

Ai gjithashtu do të riafirmojë përkushtimin e Shteteve të Bashkuara ndaj vendeve të Ballkanit Perëndimor, ndërsa ato ndjekin integrimin euroatlantik dhe bashkëpunimin më të thellë rajonal.

Burimi ATSH