Ministrja e Shëndetësisë dhe Mirëqenies Sociale, Klodiana Spahiu, gjatë një vizite sot në Spitalin Rajonal të Elbasanit, u shpreh se sistemi i radiologjisë do të unifikohet në një platformë të mbështetur nga inteligjenca artificiale, me qëllim përmirësimin e diagnostikimit, rritjen e standardeve dhe forcimin e bashkëpunimit mes mjekëve specialistë.

“Ne kemi në plan që shumë shpejt i gjithë sistemi i radiologjisë të jetë me një projekt me inteligjencë artificiale. Do të ketë një përparësi shumë më të madhe për të gjithë mjekët radiologë, por jo vetëm, sepse aty edhe kontrollojmë, edhe diskutojmë rastet, secili jep opinionin e vet. Duke qenë të gjithë në një sistem, edhe standardi rritet, kështu që mundohemi që edhe përgjigjja të jetë e koordinuar”, u shpreh Spahiu.

Spahiu bëri të ditur se investimet në teknologji dhe infrastrukturë do të vijojnë, përfshirë edhe institucionet e shëndetit mendor, me synim përmirësimin e kushteve të trajtimit, rritjen e cilësisë së shërbimeve dhe garantimin e një kujdesi më dinjitoz për pacientët dhe personelin shëndetësor.

Burimi ATSH