Në mbledhjen e sotme qeveria ka miratuar kompensimin financiar të pronarëve të pasurive të paluajtshme private, sipërfaqet e të cilëve preken nga ndërtimet e legalizuara në disa qarqe të vendit.

Sipas vendimit, vlera e përgjithshme e kompensimit financiar është 840,7 milionë lekë, për një sipërfaqe totale prej 61 477,13 metra katrorë.

Kompensimi përfshin pronarët e pasurive të paluajtshme që preken nga ndërtimet e legalizuara në drejtoritë vendore të Agjencisë Shtetërore të Kadastrës në Tiranë Veri, Tiranë Jug, Tiranë Rurale 1, Tiranë Rurale 2, Kamzë-Vorë, Elbasan, Shkodër, Pogradec, Lezhë, Fier, Vlorë, Durrës-Kavajë-Krujë, Sarandë, Zonat e Stimuluara, Kukës, Gjirokastër dhe Berat.

Sipas vendimit, për një pjesë të pasurive të përcaktuara në shtojcën përkatëse, shuma e kompensimit financiar do të vihet në dispozicion nga Agjencia e Trajtimit të Pronave, në përputhje me parashikimet e ligjit nr. 20/2020, “Për përfundimin e proceseve kalimtare të pronësisë në Republikën e Shqipërisë”.

Në vendim përcaktohet gjithashtu se të ardhurat e arkëtuara nga drejtoritë vendore të Agjencisë Shtetërore të Kadastrës, si rezultat i kalimit të pronësisë nëpërmjet shitjes së parcelës ndërtimore, si për pasuritë shtetërore, ashtu edhe për pasuritë e të tretëve, do të përdoren për kompensimin e pronarëve.

Këto të ardhura lidhen me parcelat ndërtimore në favor të objekteve informale që legalizohen.

Drejtoritë vendore të ASHK-së do të kryejnë ndryshimet përkatëse për pasuritë në regjistrat e pasurive të paluajtshme.

Për zbatimin e vendimit ngarkohen Agjencia Shtetërore e Kadastrës dhe Agjencia e Trajtimit të Pronave.

Vendimi hyn në fuqi menjëherë dhe botohet në “Fletoren Zyrtare”.

Burimi ATSH