Dhjetë vatra zjarri janë raportuar deri në orën 14:00 të datës 28 gusht në territorin e vendit, nga të cilat shtatë vijojnë aktive, dy janë nën mbikëqyrje, ndërsa një vatër është shuar plotësisht, bëri të ditur Ministria e Mbrojtjes.

Vatrat aktive janë përqendruar në qarqet Tiranë, Dibër, Vlorë, Gjirokastër dhe Korçë.

Në malin e Dajtit, vijon ndërhyrja në tri vatra të riaktivizuara, ku janë angazhuar 25 forca zjarrfikëse dhe të strukturave të zonës së mbrojtur.

Në qarkun Dibër, aktive mbeten vatrat në Qafë të Helmës, Vajkal dhe Sllatinë. Angazhimi kryesor është përqendruar në Vajkal, ku operojnë 53 forca, mes tyre 20 efektivë të Forcave të Armatosura, si dhe një helikopter i FA-së.

Në Sllatinë janë angazhuar më shumë se 40 forca bashkiake dhe vullnetare. Sipas Ministrisë së Mbrojtjes, në këto zona nuk raportohet rrezik për zonat e banuara.

Në Tërbaç të Himarës operacioni po vijon me dy automjete zjarrfikëse dhe efektivët përkatës.

Vatra aktive raportohen edhe në Tërbuq të Gjirokastrës, ku operojnë 3 efektivë me një automjet zjarrfikës, si dhe në Plovisht të Maliqit, ku janë angazhuar 3 efektivë dhe një automjet zjarrfikës.

Ndërkohë, vatrat në Malin e Dardhës dhe Malin e Qukësit vijojnë të mbahen nën mbikëqyrje dhe nuk paraqesin rrezik për zonat e banuara.

Në mbështetje të operacioneve, përveç kapaciteteve vendore, janë angazhuar 20 efektivë dhe një helikopter i Forcave të Armatosura, me fokus të veçantë në ndërhyrjen në Vajkal.

Strukturat e Mbrojtjes Civile vijojnë monitorimin e situatës dhe ndërhyrjet në terren, me qëllim shuarjen e vatrave aktive dhe parandalimin e riaktivizimit të vatrave të izoluara.

Burimi ATSH