Procesi i digjitalizimit është “kali i betejës” i Drejtorisë së Përgjithshme të Arkivave (DPA), e cila ka sjellë Sallën e Studimit në shtëpinë e çdo shqiptari. Nga e njëjta lehtësi përfiton edhe çdo qytetar që u drejtohet arkivave për dokumente pronësore dhe biografike në adresën elektronike kërkesa.arkiva.gov.al

Drejtori i përgjithshëm i Arkivave, Auron Rrokaj u shpreh në një intervistë televizive se digjitalizimi vijon të jetë një nga përparësitë e institucionit, në angazhimin e tij për të siguruar ruajtjen afatgjatë të pasurisë dokumentare.

“Dokumentet e ndiejnë mungesën e kushteve të ruajtjes dhe e vështirësojnë goxha digjitalizimin. Drejtoria e Përgjithshme e Arkivave ka krijuar një qendër digjitalizimi. Ne do të arrijmë të jemi funksionalë në pak ditë me 100 punonjës të rinj”, tha Rrokaj.

Me mbi 20 milionë dokumente të skanuara që prej vitit 2019, arkivat shqiptare kryesojnë si më të digjitalizuarat në rajon.

Më tej, Kreu i DPA-së theksoi se falë platformës online, është rritur ndjeshëm numri i studiuesve të regjistruar, të cilët hulumtojnë nga kompjuteri i tyre personal, si të ishin të pranishëm në Sallën e Studimit në Tiranë.

Në vazhdën e botimeve periodike prej 5 vitesh radhazi, DPA-ja po përzgjedh botimet studimore të radhës, që do të prezantohen në muajin nëntor.

Botimet vijnë në përgjigje të thirrjes periodike adresuar çdo të interesuari të bashkësisë shkencore, për publikime mbi periudha dhe figura të rëndësishme në historinë e vendit, si edhe mbi metodologjinë arkivore në hapësirën shqiptare.

Burimi ATSH