Ministri i Turizmit, Kulturës dhe Sportit, Blendi Gonxhja informoi sot se numri i parcelave dhe stacioneve të plazhit publik është rritur me 67% këtë sezon, ndërsa sipërfaqja e tyre është zgjeruar me mbi 10% në të gjithë vendin.

Gonxhja, në një postim në rrjetet sociale, e cilëson Sarandën si një shembull të rezultateve të arritura në drejtim të garantimit të një aksesi më të gjerë dhe të përballueshëm në plazhet publike.

“Atmosfera në Sarandë është shprehja më e mirë e rezultateve konkrete që kemi arritur këtë sezon për plazhet publike dhe garantimin e një aksesi më të gjerë e të përballueshëm për qytetarët”, shprehet Gonxhja.

Sipas ministrit, krahas zgjerimit të numrit dhe sipërfaqes së parcelave publike, këtë vit është zbatuar edhe një model i ri menaxhimi nga bashkitë, me tarifa të miratuara dhe të balancuara.

Gonxhja thekson se Saranda përbën një shembull të mirë të bashkëpunimit dhe koordinimit institucional, duke sjellë më shumë akses dhe siguri, si dhe më pak ankesa nga publiku.

“Ka ende punë për të bërë, por ky është një rezultat pozitiv mbi të cilin duhet të vijojmë të ndërtojmë, për të garantuar plazhe publike, të aksesueshme dhe të përballueshme për qytetarët dhe vizitorët”, thekson ministri.

Rritja e hapësirave publike të plazheve dhe zgjerimi i sipërfaqeve të tyre synojnë të krijojnë më shumë mundësi për pushuesit vendas dhe të huaj, veçanërisht gjatë muajve të sezonit të lartë turistik.

Ditën e sotme, ministri i Punëve të Brendshme, Besfort Lamallari, ministri i Turizmit, Kulturës dhe Sportit, Blendi Gonxhja dhe kryetari i bashkisë së Sarandës, Oltion Çaçi zhvilluan një inspektim të masave të marra për mbarëvajtjen e sezonit turistik, në një kohë kur flukset e turistëve dhe qytetarëve në portet dhe pikat e tjera të kalimit kufitar vijojnë të rriten.

Marrë nga ATSH