Ministrja e Shtetit për Marrëdhëniet me Parlamentin, Erjona Ismaili deklaroi sot në Kuvend se, procesi i integrimit evropian duhet të mbetet një projekt kombëtar mbi ndarjet politike, duke i bërë thirrje opozitës që të kontribuojë në mënyrë konstruktive në rrugëtimin e Shqipërisë drejt Bashkimit Evropian.

Në fjalën e saj në Kuvend, ajo theksoi se Shqipëria ndodhet në një moment historik, ndërsa vendi synon mbylljen e negociatave deri në vitin 2027 dhe anëtarësimin e plotë në BE në vitin 2030.

Sipas ministres Ismaili, politika duhet të tejkalojë interesat e ditës dhe konfliktet partiake përballë një objektivi që prek të ardhmen e vendit.

“Ne të gjithë këtu u detyrohemi shqiptarëve që në dyert e BE-së të mos trokasim si dy kampe, por si komb”, u shpreh ministrja.

Ajo vlerësoi progresin e bërë në procesin e negociatave, duke përmendur hapjen e kapitujve, avancimin në reformat themelore, investimet e huaja, digjitalizimin dhe përafrimin e politikës së jashtme me atë të Bashkimit Evropian.

Një pjesë e rëndësishme e mesazhit të saj iu drejtua opozitës, për të cilën tha se nuk duhet ta shohë veten jashtë procesit të integrimit.

“Opozita nuk mund dhe nuk duhet ta shohë veten si përjashtim nga ky proces. Duhet të na bashkojë një qëllim: anëtarësimi i Shqipërisë në BE”, deklaroi ajo.

Ministrja kritikoi gjithashtu atë që e quajti “baltosje të Shqipërisë” në arenën ndërkombëtare për interesa politike të brendshme, duke paralajmëruar se sulmet ndaj partnerëve evropianë dhe institucioneve që mbështesin vendin dëmtojnë imazhin e Shqipërisë.

Ajo përmendi mbështetjen e vazhdueshme të Delegacionit të Bashkimit Evropian në Tiranë dhe të ambasadorëve të vendeve anëtare, si dhe deklaratat e Komisioneres për Zgjerimin, Marta Kos, për ambicien e Shqipërisë që të përmbyllë negociatat në vitin 2027.

“Nuk ka veprim më antishqiptar, sesa fyerja e partnerëve që na mbështesin”, theksoi ministrja.

Në përfundim, ajo bëri thirrje për më shumë bashkëpunim politik në Kuvend dhe në komisionet parlamentare, duke kërkuar që procesi i integrimit të mos përdoret si armë politike.

“Le ta bëjmë këtë proces pronë të Shqipërisë, jo armë të politikës”, deklaroi ajo.

Marrë nga ATSH