Një fundjavë e veçantë sportive dhe komunitare u zhvillua në Tiranë nga Inter Club Albania, ku morën pjesë mbi 500 anëtarë të këtij komuniteti, i konsideruar si më i madhi në botë për klubin italian “FC Internazionale Milano”.

Aktivitetet kulmuan me praninë e dy ish-legjendave të Interit, Francesco Toldo dhe Walter Samuel, të cilët zhvilluan një takim të hapur me tifozët në kryeqytet. Gjatë këtij eventi, pjesëmarrësit patën mundësi të realizonin fotografi dhe të merrnin autografe, si dhe të ndanin kujtime dhe përvoja të lidhura me klubin zikaltër.

Në vijim të aktiviteteve, u organizua edhe “Inter Club Run”, një maratonë me karakter bamirësie në rrugët e Tiranës, e hapur për të gjithë anëtarët.

Gara përfundoi me ceremoninë e ndarjes së çmimeve për fituesit në kategori të ndryshme, ku çmimet u dorëzuan nga vetë Toldo dhe Samuel.

Sipas organizatorëve, kjo fundjavë konfirmoi edhe një herë lidhjen e fortë të tifozëve shqiptarë me klubin italian, si dhe rëndësinë e rrjetit ndërkombëtar të Inter Club, i cili numëron mbi 140 klube jashtë Italisë në 73 vende të botës.

Inter Club Albania është vlerësuar së fundmi si klubi më i madh në nivel global, me mbi 3,200 anëtarë të regjistruar, duke e bërë Shqipërinë një nga qendrat më aktive të tifozërisë zikaltër në botë.

Burimi ATSH