Drejtori i Përgjithshëm i Doganave, Besmir Beja, zhvilloi një vizitë pune pranë Sekretariatit të CEFTA-s, ku u takua me drejtoreshën Pranvera Kastrati, në kuadër të forcimit të bashkëpunimit institucional dhe përgatitjeve për vitin 2026, kur Shqipëria do të mbajë presidencën e radhës së CEFTA-s.

Beja tha se, gjatë takimit u theksua rëndësia e rolit të administratës doganore shqiptare në lehtësimin e tregtisë, avancimin e proceseve të digjitalizimit dhe mbështetjen për Operatorët Ekonomikë të Autorizuar, si pjesë e përmirësimit të klimës së biznesit në rajon.

Po ashtu, u vlerësua angazhimi i Doganave Shqiptare në shkëmbimin e informacionit, zbatimin e rregullave të origjinës dhe bashkëpunimin në kuadër të projektit SEED, si instrument për rritjen e efikasitetit dhe transparencës doganore.

“Shqipëria vijon të luajë një rol aktiv në nismat rajonale për lehtësimin e tregtisë dhe forcimin e bashkëpunimit doganor në hapësirën CEFTA”, theksoi Beja.

Burimi ATSH