Ministri i Punëve të Brendshme, Besfort Lamallari, deklaroi sot në Kuvend se nuk ka asnjë informacion konkret për kërcënim real ndaj sigurisë në Shqipëri, pas paralajmërimeve të ngritura nga ambasada amerikane në vendin tonë se grupet e lidhura me Iranin mund të shënjestrojnë subjekte të lidhura me Shtetet e Bashkuara ose elementë të opozitës iraniane në Shqipëri.

Lamallari nënvizoi se strukturat e sigurisë janë angazhuar menjëherë për verifikimin e situatës.

“Dua të sjell në vëmendje dhe të ndaj disa informacione me qytetarët. Fakti i parë, jo më larg se mbrëmjen e djeshme, iu kam kërkuar strukturave të Policisë, konkretisht strukturave të Antiterrorit, të Departamentit të Sigurisë Publike dhe Policisë Kriminale, të jenë në komunikim me zyrën e Sigurisë së Ambasadës Amerikane, nga të cilat me përgjegjësi të plotë konfirmoj se është komunikuar, e nuk ka asnjë informacion konkret, qoftë edhe inteligjencë, për një situatë rreziku real”, tha Lamallari.

Ministri sqaroi se deklarata të tilla janë standarde dhe ndodhin në shumë vende, ndërsa masat e shtuara të sigurisë në Shqipëri nuk lidhen drejtpërdrejt me njoftimet e fundit.

Lamallari theksoi se këto masa lidhen edhe me situatën globale, përfshirë tensionet dhe konfliktet në Lindjen e Mesme, duke shtuar se strukturat si Antiterrori, Policia Kriminale dhe forcat e posaçme janë në gatishmëri të plotë dhe në komunikim të vazhdueshëm me partnerët ndërkombëtarë.

“Së dyti, kjo është në vazhdën e të gjitha postimeve, deklaratave që bëhen standard në të gjitha vendet e botës ku ka shqetësime të ndryshme. Shqipëria dhe Policia e Shtetit prej disa kohësh kanë marrë masa të shtuara sigurie, jo lidhur me postimin e djeshëm, por prej disa kohësh, dhe kjo bazuar në zhvillimet ndërkombëtare që ndodhin. Konkretisht me konfliktin e armatosur dhe luftën në Lindjen e Mesme, ku sigurisht janë të angazhuara maksimalisht Policia e Shtetit, strukturat e Antiterrorit, Policisë Kriminale, FNSH-së dhe sigurisë publike, duke qenë në komunikim të vazhdueshëm me të paktën dy ambasada në vend”, tha Lamallari.

Sipas ministrit ka një plan veprimi për përballimin e çdo rreziku të mundshëm. Lamallari siguroi qytetarët se vendi mbetet i sigurt.

“Pra, ky është një fakt që nuk ka lidhje me postimin e djeshëm, ka nisur kohë më parë dhe ka një vlerësim nga Policia e Shtetit lidhur me rreziqet e mundshme të terrorizmit apo elementëve të tjerë kriminalë. Ka edhe një plan veprimi, i cili bën bashkë me detyra specifike çdo strukturë përgjegjëse në Policinë e Shtetit.

“Fakt është që Shqipëria mbetet një vend i sigurt për qytetarët shqiptarë dhe për të gjithë ata që vizitojnë Shqipërinë. Përtej postimeve që ju i lexoni, për fat të keq, vetëm kur vijnë nga Irani apo që lidhen me Iranin, por jo për protestat e dhunshme me molotov”, tha Lamallari.

Marrë nga ATSH