Agjencia Shtetërore e Kadastrës (ASHK) publikoi sot mënyrën e aplikimit në portalin qeveritar “e-Albania” për rivlerësimin e pasurive.

Qytetarët duhet të identifikohen në “e-Albania”, të zgjedhin shërbimin: “Rivlerësimi i Pasurisë” dhe më pas të klikojnë “Përfaqësuesi është i njëjtë me aplikantin”.

Në faqen pasardhëse, qytetarët mund të zgjedhin pasurinë që duan të rivlerësojnë, automatikisht shtohet edhe shërbimi “Lëshim kopje kartele të pasurisë së paluajtshme”.

Në vijim ngarkohet një dokument pronësie ose aktin e ekspertimit dhe licensën e ekspertit në PDF, nëse rivlerësimin e keni kryer me ekspert të licensuar, ndërsa në faqen pasardhëse është reflektuar tarifa minimale e shërbimit, në përfundim klikoni “Dërgo”.

Tarifa e shërbimit që shfaqet gjatë aplikimit nuk është fikse, por do të përllogaritet në varësi të shumës së tatimit që do të rezultojë nga rivlerësimi: Deri në 150 000 lekë tatim tarifa është 3500 lekë; Nga 150 001 – 300 000 lekë tatim tarifa është 7 000 lekë; Mbi 300 001 lekë tatim tarifa është 10 000 lekë.

Pas përllogaritjes ose verifikimit të rivlerësimit të kryer nga eksperti i licensuar, përcaktohet tarifa e saktë e shërbimit e cila përfshihet në faturën që ju vjen në “e-Albania”.

Ministria e Financave dhe Agjencia Shtetërore e Kadastrës (ASHK) publikuan në Fletoren Zyrtare udhëzimin e përbashkët, që përcakton mënyrën e llogaritjes së bazës tatimore për rivlerësimin e pasurive të paluajtshme të individëve.

Një nga rregullat kryesore të udhëzimit është se, për ndërtesat, çmimi minimal fiskal do t’i zvogëlohet 1% për çdo vit të plotë përdorimi, duke filluar nga data e fitimit të titullit të pronësisë për herë të parë.

Marrë nga ATSH