Presidentja e Komisionit Evropian, Ursula von der Leyen u shpreh për uljen e tarifave të roamingut mes Bashkimit Evropian dhe Shqipërisë, duke e cilësuar këtë një mundësi për afrimin e qytetarëve.

Në konferencën e përbashkët për shtyp të mbajtur sot me kryeministrin Edi Rama, Von der Leyen tha se negociatat për roaming-un duhet të përshpejtohen.

“Çështja e dytë për të cilën ne po punojmë është ulja e tarifave të roaming-ut. Sepse unë besoj që kjo është një mundësi shumë e mirë që njerëzit të afrohen me njëri-tjetrin dhe këto negociata duhet t’i përshpejtojmë”, u shpreh ajo.

Presidentja e KE-së tha se do të rikthehet në Shqipëri në ditën kur të nisë roaming-u pa pagesë.

“Unë ju premtoj se, në rast se ju negocioni me ne dhe me kompanitë në mënyrë të suksesshme, unë do të kthehem pikërisht atë ditë, kur ne do të fillojmë roaming falas këtu në Shqipëri”, deklaroi Von der Leyen.

Burimi ATSH