Forcimi i shërbimeve sociale dhe koordinimi i punës mes strukturave qendrore dhe rajonale ishin në fokus të një takimi të ministres së Shëndetësisë dhe Mirëqenies Sociale, Klodiana Spahiu me drejtuesit rajonalë të shërbimeve sociale.

Në një postim në rrjetet sociale, Spahiu thekson se shërbimet sociale duhet të jenë pranë qytetarëve dhe të përgjigjen në kohë ndaj nevojave të tyre, veçanërisht për familjet dhe kategoritë që kanë më shumë nevojë për mbështetje.

“Shërbimet sociale duhet të jenë aty ku janë nevojat e qytetarëve”, shprehet Spahiu, duke nënvizuar si prioritete forcimin e shërbimeve, adresimin e problematikave dhe bashkëpunimin më të ngushtë mes strukturave qendrore dhe rajonale.

“Ne po punojmë shumë fort që të ngremë institucionet dhe ajo nënë ta çojë fëmijën atje në orën 8:00 tek qendrat ditore dhe të shkojë ta marrë në orën 3:00”, tha ajo.

Spahiu kërkoi që punonjësit e shërbimeve sociale të tregojnë empati dhe qasje njerëzore ndaj qytetarëve që u drejtohen institucioneve.

“Sa të futeni te institucioni e derisa të dilni, për njerëzit që aty hyjnë dhe dalin, ju duhet të jeni gjithmonë buzagaz. Dhe këtë unë e kërkoj me ngulm, për të shprehur empatinë ndaj kësaj kategorie”, u shpreh ministrja.

Spahiu theksoi se puna do të vijojë edhe për identifikimin e nevojave dhe diagnozave shoqëruese të rasteve, duke respektuar kuadrin ligjor dhe rregullat në fuqi.

“Do të përpiqemi brenda ligjit, brenda rregullit, të gjenden diagnozat shoqëruese”, tha Spahiu.

Burimi ATSH