Bashkia Vau i Dejës ka nisur hapat për konkretizimin e një marrëveshjeje binjakëzimi me Bashkinë e Perugias në Itali, me synim forcimin e bashkëpunimit institucional dhe shkëmbimin e eksperiencave.

Kryetari i Bashkisë Vau i Dejës, Kristian Shkreli, zhvilloi në Perugia një takim me kryetaren e kësaj bashkie, Vittoria Ferdinandi, ku u diskutuan mundësitë për vendosjen e një marrëdhënieje të qëndrueshme bashkëpunimi mes dy njësive vendore.

Në takim morën pjesë edhe përfaqësues të Këshillit Bashkiak dhe administratës së Bashkisë Vau i Dejës.

Sipas Shkrelit, binjakëzimi synon të shkojë përtej një marrëveshjeje formale, duke krijuar mundësi konkrete për bashkëpunim në kulturë, turizëm, ekonomi dhe administrim vendor, si dhe për promovimin e vlerave dhe potencialeve të dy territoreve.

Lidhja me Perugian pritet të mundësojë projekte të përbashkëta, shkëmbime mes institucioneve dhe komuniteteve, si dhe përfitimin nga eksperienca italiane në funksion të zhvillimit lokal të Vau i Dejës.

Burimi ATSH