Forcimi i bashkëpunimit rajonal dhe shkëmbimi i përvojave për rritjen e sigurisë në sistemet penitenciare ishin në fokus të konferencës rajonale të zhvilluar në Shkup (Maqedoni e Veriut).

Shqipëria u përfaqësua në këtë aktivitet nga drejtori i përgjithshëm i Burgjeve, Adriatik Kupi dhe zëvendësdrejtori i përgjithshëm, Anesti Kapllani.

Konferenca me temë “Krimi i Organizuar në Burgje, Forcimi i Integritetit, Inteligjencës dhe Bashkëpunimit në Evropën Juglindore” u organizua nën kujdesin e Misionit të OSBE-së në Shkup dhe Ambasadës së SHBA-së në Maqedoninë e Veriut.

Në takim morën pjesë përfaqësues të administratave penitenciare, ministrive të Drejtësisë dhe të Brendshme, agjencive ligjzbatuese, prokurorisë, gjyqësorit, shërbimeve të provës, institucioneve antikorrupsion, akademisë dhe organizatave ndërkombëtare nga vendet e Evropës Juglindore, përfshirë Shqipërinë, Kosovën dhe Maqedoninë e Veriut.

Pjesë e konferencës ishin edhe përfaqësues të organizatave dhe rrjeteve ndërkombëtare të fushës penitenciare, mes tyre Shoqata Ndërkombëtare Korrektuese të Burgjeve (ICPA) dhe Organizata Evropiane e Burgjeve (EuroPris).

Gjatë konferencës u diskutua mbi sfidat e përbashkëta që lidhen me sigurinë në burgje, luftën kundër krimit të organizuar, forcimin e integritetit institucional dhe përdorimin e inteligjencës në parandalimin dhe goditjen e veprimtarisë kriminale brenda sistemit penitenciar.

Pjesëmarrja e përfaqësuesve të Shqipërisë në këtë forum rajonal shërbeu si një mundësi për shkëmbimin e praktikave dhe përvojave me homologët e vendeve të rajonit, si dhe për forcimin e bashkëpunimit ndërinstitucional në funksion të rritjes së sigurisë dhe integritetit të sistemit penitenciar.

Marrë nga ATSH