Ministri i Punëve të Brendshme, Besfort Lamallari, zhvilloi një takim me drejtuesit e Inspektoratit Kombëtar të Mbrojtjes së Territorit (IKMT), ku në fokus ishte bashkërendimi i punës për parandalimin e ndërtimeve pa leje, ndalimin e abuzimeve me hapësirat publike dhe luftën kundër krimeve mjedisore.

Përmes një postimi në rrjetet sociale, Lamallari theksoi rëndësinë e forcimit të bashkëpunimit dhe të pranisë së strukturave shtetërore në terren.

“Me drejtuesit e Inspektoratit Kombëtar të Mbrojtjes së Territorit, diskutuam për bashkërendimin e punës në parandalimin e ndërtimeve pa leje, ndalimin e abuzimeve me hapësirat publike dhe luftën kundër krimeve mjedisore”, shkruan Lamallari.

Sipas tij, një tjetër element i rëndësishëm është rritja e komunikimit dhe përgjegjshmërisë së punonjësve të IKMT-së gjatë punës në terren.

“Me rëndësi që çdo punonjës i IKMT në terren të ketë më shumë komunikim, më shumë përgjegjshmëri dhe prani të pandërprerë aty ku qytetarët kanë nevojë për shtetin”, njoftoi ministri.

Marrë nga ATSH