Fermerët e shpallur fitues në fazën e parë të aplikimit për Skemën Kombëtare të Mbështetjes në Bujqësi 2026 kanë afat deri më 11 shtator për të dorëzuar dokumentacionin e kërkuar për përfitimin e mbështetjes financiare.

Agjencia për Zhvillim Bujqësor dhe Rural (AZHBR) njoftoi shtyrjen e afatit për dorëzimin e dokumentacionit shtesë për fermerët aplikantë në masat mbështetjes 1–7 dhe 9.

Sipas AZHBR-së, shtyrja e afatit synon t’u japë aplikantëve kohë të mjaftueshme për plotësimin e dokumentacionit, si dhe të lehtësojë procesin e administrimit dhe verifikimit.

Afati i mëparshëm për përfituesit e masave 1 deri në 4 ishte 10 gusht, ndërsa për masat 5 deri në 7 dhe masën 9 ishte 13 gusht 2026.

AZHBR thekson se aplikantët që nuk plotësojnë dokumentacionin e kërkuar brenda afatit të përcaktuar do të skualifikohen nga skema mbështetëse.

Skema Kombëtare e Mbështetjes në Bujqësi 2026 ka regjistruar 42 728 aplikime.

Fieri kryeson për numrin e aplikimeve, i ndjekur nga Korça, Elbasani dhe Vlora.

Skema e këtij viti përfshin 12 masa mbështetëse, prej të cilave 9 janë masa direkte dhe 3 masa investimesh.

Masat direkte përfshijnë mbështetjen për tufën bazë të gjedhit dhe të imtave, bletarinë, dosat dhe paradosat, kontrollin biologjik, fermat organike, certifikimin Global G.A.P., sipërfaqet e mbjella dhe ripopullimin e ujërave të brendshme.

Interesi më i lartë është regjistruar për tufën bazë të të imtave me 7236 aplikime, bletarinë me 7016 aplikime dhe tufën bazë të gjedhit me 6732 aplikime.

Tre masat e investimeve parashikojnë mbështetje për fermerët e rinj deri në 40 vjeç, ndërtimin dhe rikonstruksionin e staneve dhe mekanizimin e bujqësisë.

Masat synojnë uljen e kostove të prodhimit, rritjen e cilësisë së produkteve, përmirësimin e standardeve dhe nxitjen e praktikave të qëndrueshme në bujqësi.

Burimi ATSH