Investimi për përmirësimin e furnizimit me ujë të pijshëm në fshatrat Mërqi dhe Raboshtë të Lezhës po vijon, me synimin për të garantuar furnizim të pandërprerë 24 orë në ditë për banorët e zonës.

Gjatë vizitës në terren, drejtori i përgjithshëm i Agjencisë Kombëtare të Ujësjellës Kanalizimeve (AKUK), Fludian Çuka, së bashku me drejtuesit e Shoqërisë Rajonale Ujësjellës Kanalizime Lezhë, inspektoi punimet dhe diskutoi mbi ecurinë e investimit dhe përmirësimin e shërbimit ndaj qytetarëve.

Projekti përfshin ndërtimin e burimeve të reja, rikonstruksionin e veprave ekzistuese, ndërtimin e rezervuarëve dhe shtrimin e rrjetit të ri të transmetimit dhe shpërndarjes së ujit.

Çuka tha se, investimi parashikon 70 kilometra rrjet të ri dhe rreth 800 lidhje të reja për familjet, duke zgjeruar aksesin në furnizimin me ujë të pijshëm.

Sipas tij, objektivi kryesor është garantimi i furnizimit 24 orë me ujë, përmes një infrastrukture më të qëndrueshme dhe funksionale.

Investimi pritet të përfundojë brenda muajit shtator të këtij viti dhe synon të sjellë përmirësim të ndjeshëm të shërbimit të ujësjellësit për banorët e Mërqisë, Raboshtës dhe zonave përfituese.

Burimi ATSH