Bashkimi Evropian dhe Shqipëria kanë vendosur të thellojnë bashkëpunimin në fushën e sigurisë dhe mbrojtjes përmes Partneritetit të Sigurisë dhe Mbrojtjes, me fokus përballimin e sfidave dhe kërcënimeve të përbashkëta.

Delegacioni i BE-së në Shqipëri bëri të ditur se kërcënimet e sotme nuk njohin kufij, ndaj partneritetet e sigurisë dhe mbrojtjes synojnë të shndërrojnë interesat e përbashkëta në veprime konkrete.

Partneriteti BE-Shqipëri përfshin bashkëpunimin në disa fusha, mes tyre menaxhimi i krizave, përballimi i kërcënimeve hibride dhe kibernetike, lufta kundër terrorizmit dhe menaxhimi i kufijve.

Sipas BE-së, Partneritetet e Sigurisë dhe Mbrojtjes janë instrumente politike dypalëshe, jo detyruese, që mundësojnë bashkëpunim me vendet partnere për çështje të tilla si menaxhimi i krizave, siguria kibernetike, siguria detare, lufta kundër terrorizmit dhe qëndrueshmëria e infrastrukturës kritike.

Partneritetet synojnë gjithashtu forcimin e koordinimit në nismat e mbrojtjes, zhvillimin e aktiviteteve të përbashkëta dhe përfshirjen e vendeve partnere në misionet dhe operacionet e Politikës së Përbashkët të Sigurisë dhe Mbrojtjes së BE-së.

Një tjetër fushë e rëndësishme është përballimi i kërcënimeve të reja, përfshirë sulmet hibride, dezinformimin dhe kërcënimet kibernetike, si dhe forcimi i përpjekjeve për ndërmjetësimin e konflikteve dhe parandalimin e tyre.

BE-ja thekson se vendet që kanë një Partneritet të Sigurisë dhe Mbrojtjes mund të kenë akses në prokurimin e përbashkët të mbrojtjes përmes instrumentit SAFE (Security Action for Europe), ndërsa subjektet e tyre mund të përfitojnë nga financimet e BE-së pas miratimit të marrëveshjeve shtesë.

Shqipëria është ndër vendet partnere me të cilat BE-ja ka lidhur këtë lloj marrëdhënieje, me Partneritetin e Sigurisë dhe Mbrojtjes të nënshkruar më 18 dhjetor 2024.

Sipas BE-së, këto partneritete synojnë të forcojnë bashkëpunimin ndërkombëtar dhe aftësinë për t’iu përgjigjur sfidave të reja të sigurisë, duke e konsideruar stabilitetin afatgjatë si një rezultat të partneriteteve të qëndrueshme dhe të besueshme.

Burimi ATSH