Ambasadori i Holandës në Shqipëri, Reinout Vos, zhvilloi një vizitë në Agjencia e Inteligjencës Financiare (AIF), ku u zhvillua një shkëmbim i thelluar mendimesh mbi mbikëqyrjen financiare, forcimin institucional dhe axhendën e reformave të Shqipërisë në kuadër të procesit të integrimit në Bashkimin Evropian.

Gjatë takimit me Drejtorin e Përgjithshëm të AIF-së, Ervin Koçi, u diskutua mbi përparimin e deritanishëm të institucionit në drejtim të përmbushjes së standardeve evropiane, si dhe mbi sfidat dhe prioritetet në vijim.

Diskutimet pasqyruan përgatitjen serioze të Agjencisë dhe angazhimin e fortë për të çuar përpara reformat e kërkuara në kuadër të procesit të anëtarësimit.

Qasja profesionale, gatishmëria teknike dhe fokusi i qartë strategjik i AIF-së u vlerësuan si elementë që dëshmojnë progresin e rëndësishëm në përafrimin me standardet e BE-së, veçanërisht në fushën e luftës kundër pastrimit të parave dhe financimit të terrorizmit.

Agjencia e Inteligjencës Financiare luan një rol vendimtar në procesin e integrimit të Shqipërisë në BE, pasi hetimet financiare efektive, sistemet e konsoliduara kundër pastrimit të parave dhe bashkëpunimi i forcuar ndërinstitucional përbëjnë shtylla thelbësore për përmbushjen e kritereve të pranimit.

Ambasadori Vos theksoi rëndësinë e dialogut të hapur dhe konstruktiv mes institucioneve, duke rikonfirmuar mbështetjen e Holandës për avancimin e reformave dhe për thellimin e mëtejshëm të bashkëpunimit ndërmjet autoriteteve përkatëse në funksion të rrugëtimit evropian të Shqipërisë.

Marrë nga ATSH