Operatori i Shpërndarjes së Energjisë Elektrike (OSHEE) njoftoi se situata në rrjet është përmirësuar ndjeshëm pas motit të keq që përfshiu vendin gjatë orëve të para të mëngjesit të sotëm, duke shkaktuar defekte të përkohshme në disa zona.

Sipas OSHEE, falë ndërhyrjeve të shpejta të ekipeve të avarisë, numri i fiderave me defekt është reduktuar me rreth 70%, duke ulur ndjeshëm edhe numrin e abonentëve të mbetur pa energji elektrike.

Aktualisht, nga raportimet e 11 rajoneve të OSSH-së, janë 14 fidera të stakuar, ndërsa më të prekura rezultojnë zonat e Lezhës, Krujës dhe Tepelenës. Edhe në këto zona, situata po shkon drejt normalizimit.

Në terren janë angazhuar 1500 punonjës të organizuar në brigada avarie, në zbatim të planit të masave për përballimin e motit të keq, të gatshëm për ndërhyrje të menjëhershme për lokalizimin dhe riparimin e defekteve.

OSSH siguroi se të gjitha institucionet me rëndësi të veçantë, përfshirë spitalet dhe hidrovoret, po furnizohen normalisht dhe pa ndërprerje.

Grupet e avarisë mbeten në gatishmëri të plotë për rikthimin sa më të shpejtë të energjisë elektrike në zonat e prekura.

Abonentët mund të raportojnë çdo problematikë në rrjet përmes kontaktit rajonal ose duke telefonuar në numrin e Call Center të OSHEE-së: 042 274 141, i cili funksionon 24 orë në 7 ditë të javës.

Burimi ATSH