Ministri i Bujqësisë dhe Zhvillimit Rural, Andis Salla, zhvilloi sot një takim me bletërritës dhe fermerë të Delvinës, ku prezantoi skemën e re të mbështetjes për sektorin dhe masat që qeveria po ndërmerr për të rritur prodhimin, cilësinë dhe konkurrueshmërinë e produkteve bujqësore në treg.

Ministri Salla ishte i shoqëruar edhe nga deputetët e zonës, Ardit Bido dhe Vasil Llajo.

Ministri informoi se nga janari do të hyjë në fuqi skema e re e rimbursimit 10% të TVSH-së për çdo produkt bujqësor të shitur me faturë.

Salla nënvizoi se formalizimi me NIPT është i domosdoshëm për të qenë pjesë e tregut konkurrues dhe për të pasur akses në mundësi të reja eksporti, sidomos drejt Bashkimit Europian.

“Çdo produkt bujqësor që ju do të shisni me faturë do të përfitojë 10% rimbursim TVSH-je. Kjo shumë do të llogaritet e do t’u kthehet periodikisht. Ne duam të garantojmë që puna juaj të shpërblehet dhe që tregu të jetë sa më i formalizuar dhe i drejtë. Formalizimi nuk është vetëm për të marrë 10% rimbursim. Ai ju hap dyert që produktet tuaja të njihen në treg, të jenë konkurruese me çmim dhe cilësi, dhe të përputhen me standardet e BE-së”, theksoi ministri Salla.

Burimi ATSH