Ministri i Mbrojtjes, Pirro Vengu u shpreh sot se në kuadër të programit qeverisës “Shqipëria 2030”, do të ketë një kapitull të ri të dedikuar për Mbrojtjen Civile.

Në aktivitetin e organizuar në Farkë, ku të pranishëm ishin Kryeministri Edi Rama, ministrja e Punëve të Brendshme, Albana Koçiu dhe Ervin Demo, ministër Shteti për Pushtetin Vendor, minstri Vengu tha se janë nxjerrë disa mësime nga sezoni i zjarreve të kësaj vere.

“Mësimi i parë është fakti që jemi në kohërat e zjarreve masive, ku 60% e territorit të dëmtuar është shkaktuar nga 18 zjarre masive. Kjo na krijon detyrën që ne të gjendemi më pranë zonave me risk dhe akses të vështirë”, tha ai.

Ministri i Mbrojtjes, u shpreh se në kuadër të programit “Shqipëria 2030” është një kapitull i dedikuar për Mbrojtjen Civile dhe kjo nuk lidhet vetëm me luftën kundër zjarreve, por me gjithë përpjekjen shtetërore në burime njerëzore, mjete, sisteme dhe pajisje.

“Për t’i bërë ballë një sërë fatkeqësish të mundshme, qofshin zjarre, përmbytje, tërmete. Nga ky këndvështrim, programi parashikon tre shtylla kryesore. E para, kapitali njerëzor, si të fuqizojmë zinxhirin reagues që nga bashkia dhe krijimin e qendrave rajonale të emergjencave. Inovacioni, i cili duhet të kthehet në një detyrë në çdo qelizë të menaxhimit të krizave, nga pikëpamja e kamerave termike, një tjetër mësim i nxjerrë nga sezoni i kaluar. Menaxhimi i emergjencave në Llogora, ishte teknologjia që na dha mundësinë që të menaxhonim dhe parandalonim situata të vështira”, vijoi Vengu.

Ministri Vengu theksoi se “ky sistem duhet të rijetëzohet dhe të mbulojë tërësinë e territorit”.

“Të gjitha këto nuk mund të ndodhin pa një vënie në efiçencë të të gjitha instrumenteve financiare që i dedikohen bashkive, qoftë fondi i kuzhtëzuar apo i pakushtëzuar”, pohoi Vengu.

Burimi ATSH