Forcat amerikane dhe shqiptare u stërvitën krah për krah me aleatët e NATO-s në kuadër të “Defender ’25”, një nga stërvitjet më të mëdha dhe më komplekse të dekadës së fundit në Evropë dhe Afrikë.

Ambasada e SHBA-së në Tiranë bëri sot të ditur se “bashkëpunimi ynë strategjik po transformohet në gatishmëri të vërtetë”.

“Forcat amerikane dhe shqiptare po stërviten krah për krah me aleatët e NATO-s, duke u mbështetur në forcën dhe bashkimin që e mbajnë rajonin të sigurt dhe kombet tona të mbrojtura”, thuhet në postimin e ambasadës amerikane në Tiranë.

“E Ngarkuara me Punë Nancy VanHorn, Gjeneral Brigade Chris McKinney nga Komanda Europiane e ShBA dhe Gjeneral Brigade Mike LaPoint nga Garda Kombëtare e New Jersey iu bashkuan sot udhëheqësve shqiptarë për të vëzhguar stërvitjen Exercise Immediate Response, një pjesë kyçe e DEFENDER ’25, dhe për të parë se si bashkëpunimi ynë strategjik transformohet në gatishmëri të vërtetë”, nënvizon ambasada e SHBA-së në Tiranë.

Stërvitja “Defender ’25” u zhvillua në disa vende të rajonit, përfshirë Shqipërinë, Kosovën, Kroacinë, Maqedoninë e Veriut dhe Malin e Zi.

Në fokus të veçantë ishte zhvillimi i aftësive për operacione të spektrit të plotë, duke përfshirë dislokimin e forcave, mbrojtjen nga sulme konvencionale dhe jo-konvencionale, mbrojtjen e infrastrukturës kritike dhe realizimin e operacioneve të përbashkëta në mjedise shumëdimensionale.

Forcat shqiptare luajtën një rol kyç në drejtimin dhe zbatimin e skenarëve stërvitorë nga rajoni i Zall-Herrit, në bashkëpunim të ngushtë me Shtabin e Brigadës Shumëkombëshe dhe oficerë nga SHBA, Kosova dhe Kroacia.

Burimi ATSH